Tuesday, April 12, 2016

बाळ बापा म्हणे काका ।
तरी तो कां निपराध ॥1॥
जैसा तैसा भाव गोड ।
पुरवी कोड विठ्ठल ॥ध्रु.॥
साकरेसि म्हणतां धोंडा ।
तरी कां तोंडा न रुचे ॥2॥
तुका म्हणे आरुष बोल ।
नव्हे फोल आहाच ॥3॥

चाल केलासी मोकळा ।
बोल विठ्ठल वेळोवेळां ॥1॥
तुज पापचि नाहीं ऐसें ।
नाम घेतां जवळीं वसे ॥ध्रु.॥
पंच पातकांच्या कोडी ।
नामें जळतां न लगे घडी ॥2॥
केलीं मागें नको राहों ।
तुज जमान आम्ही आहों ॥3॥
करीं तुज जीं करवती ।
आणिक नामें घेऊं किती ॥4॥
तुका म्हणे काळा ।
रीग नाहीं निघती ज्वाळा ॥5॥

माकडें मुठीं धरिलें फुटाणे ।
गुंतले ते नेणे हात तेथें ॥1॥
काय तो तयाचा लेखावा अन्याय ।
हित नेणे काय आपुलें तें ॥ध्रु.॥
शुकें निळकेशीं गोवियेले पाय ।
विसरोनि जाय पक्ष दोन्ही ॥2॥
तुका म्हणे एक ऐसे पशुजीव ।
न चले उपाव कांहीं तेथें ॥3॥

No comments: